KRIMBA TË SHËNDOSHË SI MOLLA

| Nga SABIT B. BAJRAKTARI |

Mollat e egra kan rënë nga degët
Vjeshta ka zbritur në të katër anët e horizontit
Zogjtë nuk fluturojnë ose nuk i shoh faji mjegulles
As i marri i lagjes sime nuk shëtitë më
Cigare s’kam me kë të dredh t’i ndërroj dy llafe
Bënë ftohtë brenda e jashtë mureve të shtëpisë
Vërtetë bënë ftohtë këtyre netëve në vendlindje

E gjitha që ka mbetur në oborr
Është një fshesë e përdorur
Një palë këpucë të shkyera
Drithniku në të cilin dallëndyshet kan ngritur fole
Pusi plotë ujë dhe kova e fundosur në të
Patkoi i kalit varur mbi pragun e derës
Tri shkallët e hyrjes së shtëpisë
Ato nuk ka kush t’i shkelë më
T’u japë jetë
Hapat kan humbur nëpër botë
Ëndrrat i ka ngulfatur ikja
Vjeshtë
Vërtetë vjeshtë bënë në oborr në fshat në shpirtë

Kam filluar që moti t’i numërojë se kush ka emigruar
Mbase më lehtë e kam t’i numërojë ata që kan mbetur
Ata të lagjes të shtëpisë…
Të cilët mund t’i numërojë në gishtat e njërës dorë
Dorës së majtë që i mungon njëri gisht

Lirinë e pash teksa endej nëpër oborr
E dehur me vetmi
E lodhur me vetmi
E vrarë me vetmi
E vërbuar me vetmi
E helmuar me vetmi
Ishte bërë parruar e pakrehur
I ngjante pacientit të shtrirë në psikiatri
Pamja e saj të frikëson nëse e shikon në sy
Të vetmën gjë që e kërkuam me shekuj
E lam të vetmuar në votër
Si pacientin lidhur në këmishën e forcës
Ikëm thellë në pafundësinë e zhbërjes

Liria ka mbetur midis oborrit
Si një pemë që përqafon egërsia e dimrit
Kokë e këmbë zbathur e harruar
Si patkoi i kalit varur mbi pragun e derës
Rrezet e diellit moti nuk janë futur në shtëpi
Terri është shtrirë në katër anët e vendlindjes
Si mollët e rëna nga degët
Ngadalë krimbat po i hanë
Krimba të shëndoshë si molla
Krimba bio

Meqë nuk kam me kë t’i ndërrojë dy llafe
Kërrusem i shikoj në sy
Dua t’i shkelë t’i mbys t’i ngulfas t’i pështyej
Të hakmerrem për kohën e ardhme të përparme

E di
Si mollët e rëna në tokë
Një ditë do t’më hanë
Krimbat e dreqit
Krimbat e zinjë
I ngjajnë vetmisë së pangjyrë që solli kjo stinë

(Shtator 2023, Milano)