| Nga NEVIANA SHEHI |
Biblioteka e vogël e restorantit në pyll
kishte pak libra
aq pak sa mund t’i fusje
nën sqetull të gjitha
Libra të vjetër me kapakë të përthyer
hapur nga duar të shumta
Edhe rafti i tyre
ishte i ndërtuar me copëza dërrasash
të sajuara dhe mbante erë lagështie
Sa i bukur mu duk aty
në mes të pyllit
Larg nga qyteti
dhe zhurmat e shfrenuara
hyra aty për të ngrëne diçka
por përballë tyre harrova urinë
Harrova përse kisha ardhur
Ndonjëherë nisesh për diku
dhe përfundon
në një vend tjetër
Shkrimtarët më shkelnin syrin nga kopertinat
sikur të më njihnin prej kohësh
dhe faqet e librit nisën të shfletonin veten
duke më mbështjellë me zëra heronjsh
dhe imagjinatash të ndezura
Pëshpëritnin edhe pemët e larta të pyllit
ndërsa unë vetëm buzëqeshja dhe mundohesha
t’u ktheja përgjigje të gjithave
Vetëm atëherë kuptova
se përse kisha ardhur në këtë restorant të largët pylli
me pemë të larta dhe një bibliotekë
me libra të vjetër
Më kishin thirrur ata…
Foto By @Olivier Guillard