| Nga NEVIANA SHEHI |
Në arenën e cirkut
duartrokiten të gjithë akrobatët
mjeshtri i numrave të shpejtësisë
luanët dhe tigrat
që kapërcejnë me guxim heroik
rrathët e frikshëm të flakëve
me një saktësi admiruese
ariu që shënon kosha
me mjeshtrin e një basketbollisti NBA -je
dhe qentë e vegjël pekinezë
edhe ketrat që vërtiten mrekullisht
mbi karuselët e varur
Marrin shumë
duartrokitje të ngrohta
nga spektatorët
Nuk mbetet pas
as mjeshtri i hipnotizimit
magjia e tij i ngre trupat në ajër
por më shumë nga të gjithë
duartrokiten majmunët zhonglerë
ata dinë të ecin
ne maje të gishtërinjve
nga një cep i litarit në tjetrin
pa u rrëzuar asnjëherë
por padrejtësisht
asnjë nuk thotë një fjalë të mirë
për shkopin e ekuilibrit
pa të cilin
asnjë zhongler ekuilibri
s’do kish mundur të bënte asnjë hap
pa thyer qafën