NË AUTOSTRADË

| Nga FARUK BUZHALA |

Ndërsa vozis kadillakun autobanit,

muzika nga radioja më bën shoqëri,

disponimin e keq dhe depresionin

që më bëjnë të ndjehem jo i lumtur,

ma lehtëson kënga e John Denverit

të cilën e këndoj së bashku me zërin e tij:

Country roads, take me home,

to the place, I belong…

Vija e verdhë që e ndanë korsinë

ma tregon kahjen kah duhet të shkoj.

Në këtë vapë që përcëllon

E në sytë e mi, mirazh krijon.

Ndërsa vozis duke kënduar

Ngrihet tym qiellit nga një pikë në horizont

Dhe unë them më vete:

Vallë mos ra nga qielli ndonjë meteor!

Pas nja një milje largësi

e vërej një siluetë bri rruge që nga larg

Derisa afrohem, e shoh se si ma bën me dorë

Shenjë e njohur, për t’u ndalë!

Dhe kur i afrohem e sodis më mirë,

qenka një bjondinë me flokë të gjata

Që i derdhen nën kapelën – mbi kokë.

Për çudi, ç’rroba të çuditshme ka, ç’hata.

E ndali kadillakun para këmbëve të saj

Dhe nga brenda e pyes

Për ku do të shkosh, ku?

Sidoqoftë, gjithsesi,kudoqoftë, më thotë.

Ndërsa në radio jehon kënga e bendit “The Who”

Hyr i them teksa i habitur e shikoj

Duke thënë me vete:

“kush dreqin e ndërroi stacionin në radio, kush?!”

E ajo…

E mban kokën ulur

duke e fshehur fytyrën nga unë

pa asnjë shkas,

lehtazi afrohet

Duke hipur në kadillak

dhe ulet në ulësen afër meje.

E marr me vete këtë autostopere dhe

i jap veturës gas.

Tani afër meje e kam një shoqëruese.

O sa i lumtur jam,

Teksa i jap kadillakut gas,

në autoban,

me shkas.

Nuk flasim derisa unë, e thej heshtjen dhe e pyes

“Prej nga je?”

Më shikon me ata sytë e zjartë dhe

Oh, ç’ma ndalë frymën shikim i saj,

Pastaj më thotë

“Nga larg, larg, nga planeti Satanaj!”

“Ku e gjete të bësh hajgare me mua në këtë vapë,” – i them.

“Nuk bëj hajgare, por të drejtën po ta them!”

“Ma dëshmo këtë nëse mundesh.” – i them

Dhe për çudi, për një çast

shkëndijëza fosforoshente u liruan nga trupi i saj

I tmerruar nisa të bërtas

Padashur kadillakut, i dhashë me këmbë gas!

Përnjëherë kadillaku u bë top zjarri

Nisi të ngjitet qiellit me shpejtësi

duke u tretur si një raketë

thellë e më thellë në galaksi.

E për të tjerat do t’ju rrëfehem

Nëse kthehem ndonjëherë nga atje!

Foto@LukasBato