KAFENEJA LAGJES

| Nga LIRIDON HYSENI |

Të ulesh në kafene

Lagjes përbri

T’a dorëzosh mllefin

Që tërë ditën ke përbi

E ku ka më mirë…?

Kur fillojnë kategoritë e shpimeve

Si në puseta

Të errëta prej zilisë

Të shtrira nëpër sytë e fqinjëve

Ku shpërthen uji i xhelozisë

Mbi drejtësinë

E mbi pushtetet

Vargje vargje thashethemet

Thuren e ç’thuren me smirë

Në tërë lagjen

E ku ka më mirë…?

Kërcejnë këshilla e kuriozitete

Si mindilat në ahengje

Por sot kafeja

Me plotë shije ç’mu dha!

Këmbën mbi këmbë,

Si mbi hava.

Kjo hava e thurun mbi retë pa shi

Veç shkrepëtimë shterpë,

Pa begati.

Porsi fjalët boshe të fqinjëve të mi.

Për çdo ditë,

E ku ka më mirë…?