“KARAKTERIZOHET ME…”, APO “KARAKTERIZOHET NGA…”

Gjuha e shqiptarëve që kanë jetuar në Jugosllavi dhe e të ndikuarve nga ta,  karakterizohet edhe nga lidhja e disa foljeve me emrin që shpreh kundrinorin e zhdrejtë me parafjalë sipas modelit të gjuhëve sllave.

Ndër ato folje është dhe folja “karakterizoj-karakterizohem”, të cilën, në formën joveprore (karakterizohem), e lidhin me emrin që shpreh kundrinorin e zhdrejtë nëpërmjet parafjalës “me” dhe thonë e shkruajnë: karakterizohet me shpejtësi, karakterizohet me dituri, me çka karakterizohet?…

Që të siguroheni se nuk kemi të bëjmë këtu me gegërishten e me dallime dialektore, mjafton ta provoni e ta mësoni se gegët e Shqipërisë nuk e thonë dhe as e shkruajnë ashtu.

Shqip, thuhet e shkruhet: karakterizohet nga shpejtësia, karakterizohet nga dituria, çka e karakterizon, nga çka (se) karakterizohet?…

Pra, thuaj “karakterizohet nga…” e mos thuaj “karakterizohet me…”

~ Prof. Ilmi Rexhepi