KËTU S’KAM Ç’KËRKOJ

| Nga DRITAN SKENDERI |

Nuk do shkruaj më

As edhe një varg

S’më mbeti asgjë

Gjithçka iku larg

 –

Morën dhimbjen time

E ngjeshën në këmbë

Rrugën me kujtime

Ma prenë gurë të rëndë

 –

Ëndrrat që nga rrënja

Shkulur hedhur tej

Vargje e rrëfenja

Gërmadhë gjithandej

 –

Gëzime e shpresa

Për një ditë të mirë

M’i ngriu krahneza

Gjer në frymë e shtrirë

 –

Lumturinë me mall

Doja ta ujis

M’u dogj e m’u kall

Sa çeli filiz

 –

Nuk do shkruaj më

As edhe një fjalë

Do këndoj pa zë

Me erën në mal

 –

Do vallëzoj me zogj

Gjithmonë do shtegtoj

Trup e shpirt m’u dogj

Këtu s’kam ç’kërkoj