| Nga DRITAN SKENDERI |
Pa gjurmë si era do të ik
Me re plagët do t’i mbështjell
Dritën time me netë do fik
Sytë e tu do t’i kem diell
Ashtu si erën s’do më hetosh
As kur vij e as kur shkoj
Por përkëdheljet që do përjetosh
Do jem unë që t’ledhatoj
Trëndafila në kopshtin tënd
Kur të mbjellësh me dashuri
Do mbij dhe unë në çdo kënd
Më i bukuri do jem për ty
Mbi shpinë mjelmash do qëndroj
Si në qiell dhe në det
Buzëqeshjen tënde do jetoj
Me mjelmat tek qesh e flet
Në vjeshtë me gjethet lehtë-lehtë
Do zbres ngadalë nën këmbët tua
Gjurma jote vulë do m’jetë
Mbi trupin tim kur shkel mbi mua