M’JE JETA PAS VDEKJES

| Nga DRITAN SKENDERI |

Më ike me erën

Të vetëm më le

Si gjethin nga pema

Më hodhe në dhé

 –

Si valët e detit

Kur bregun lëshojnë

Më hodhe si zallin

Që dallgët dëbojnë

 –

Më ike si flaka

E zjarrit në prrush

Në hi më ktheve

T’më shkelë gjithkush

 –

Dritën e syve

Në jetë s’do ma kthesh

Ma zgjat pra jetën

Yll netësh t’më jesh

 –

Kam dhembje të renda

Sëmundja m’je ti

Po s’dua t’shërohem

S’jetoj dot pa ty

 –

Helmin që piva

Me ashk që ma dhe

Gjakun m’helmoi

Por ti brenda je

 –

Me ikjen në heshtje

Më erdhe më pranë

N’një vend më braktise

Të gjeta n’çdo anë

 –

M’helmove më smure

Në krahët e mi

Për dore të mbaja

Por tash në brendi

 –

Veç vdekjen ma vrave

Se jeta m’je ti

Dhe jeta pas vdekjes

Që m’dhe përjetësi