QYSH SE TY TË PASHË

| Nga DRITAN SKENDERI |

Hija e njërës më ndjek nga pas
Dritë e tjetrës më ndriçon
U afrohem, po s’guxoj t’u flas
Gjithsecila n’ty m’kujton
Njëra rrugës ecë me naze
Tjetra flet me za të ngroht’
Lëshon tingujt porsi saze
T’dyjat n’shpirt m’godasin fort
Njëra duar e tjetra flokë
Njëra buzë e tjetra sy
Njëra shtatin me gjithë kokë
Në të gjitha të shoh ty
Njëra hijen ta ka vjedhur
Njëra duar, buzë e sy
Tjetra n’dritën tande fshehur
N’shtat, ja n’flokun tand të zi
A s’e sheh moj bukuri
S’kam unë sy, të tjerë për t’parë
Qysh atëherë kur të pash ty
Ma as veten s’e kam parë